BLOGGER TEMPLATES AND TWITTER BACKGROUNDS

Apr 5, 2009

صابرة

Painting by Mahmoud Said

كل يوم و الناس نيام
سهرانة صابرة لا تنام
تناجي الواحد الأحد
كان نفسها ييجي الولد
يمسح الدمع اللي انسكب
يصلب الضهر اللي انقسم
يشفي الالام ... يحيي الامال ... يغسل بمية ورد القلب اللي التهب
كان نفسها ييجي الولد
...
صابرة عاشت كوخ و قصر
صابرة .. صابرة في كل عصر
تحمل و تولد ييجو الولاد
اللي فسد و اللي ظلم
و اللي اتسرق و اللي اتظلم
و اللي من القهره انتحر
و اللي زايد و اللي باع للي اشترى
و اللي فاكرها وسية فزاد و افترى
و اللي ما همه الا همه و العيال
و اللي في عرض البحر نط بالامال ...للبر يوصل يا اما يغرق و السلام
كان نفسها ييجي الولد
...
صابرة ما فقدت الامل
شالت جراحها و عالطبيب
يمكن يكون عنده الدوا
بص ف حشاها و قالها
بشرى يا صابرة ابشري
ايدي الشموع و هللي
بعد السنين بعد الجلد
هاداكي الواحد الأحد
شايف أنا بعيوني دول
فيه نبتة خضرة صغيرة
حالفة تزهر للأبد
زهرة شباب قلبك يا صابرة
بدل الولد مليون ولد
في اديهم الخير و العمار
في قلوبهم حب للديار
و عنيهم الحمر الشرار
للي ناوي عالدمار
هيجزوا منك الحشيش
و اي نبت يكون خبيث
و قلبك تاني راح يعيش
الفرح و الخير و الامان
...

13 comments:

حنان الشافعي said...

هقولك ايه اكتر من تحفه بجد
اسلوبك وكلماتك كلها جميله
والفكره واضحه وليها هدف
حقيقي جميله جدا
بس عندي ملاحظه
ديما الخاتمه بتكون اهم جزء
لو تقبلي كلامي انا حسيتها اقل شويه من المتن نفسه بس ده ميمنعش ان كلامي نابع من قوة الكلمات
وهذا مجرد راي ولك مطلق الحريه في التصرف
وبالنسبه لانك اول مره تكتبي بالعاميه
فكده تبقي موهبه قويه حباكي بيها الله عز وجل
خلي بالك عليها
وللامام
ودي

بـراااح said...

صباح الفل يا حنان
بجد بيسعدني دايما وجودك في البراح و كلماتك الرقيقة... و كمان سعدت جدا بنقدك و اشكرك علي ملاحظتك و مشاركتي اياها ... بصي انتي معاكي حق .. انا كمان حسيت بكده لما قريتها تاني
بس انا لما كتبنها تركت احساسي يقود القلم و حين توقف الاحساس عن الاملاء توقف القلم عن الكتابة
صدقيني انا فكرت كتير في ملاحظتك و بحثت داخل احساسي لماذا توقف هكذا فجاة فلم اجد سوى بعض الاحتمالات...
احتمال انني خشيت الاسترسال في الامال... او ان تعد كلماتي مقارنة بالواقع ضربا من الخيال
...
او انني فقط اردت ان اترك النهاية لكل قاريء ليكملها داخل نفسه على حسب ما يملك من رصيد امل
... او انني ببساطة لازلت اتلمس خطاي و كلماتي داخل بحور الشعر
اشكرك كثيرا علي ملاحظتك و سعيدة جدا ان اعجبتك محولاتي الاولي للكتابة

شهرزاد said...

براح الجميلة
اعتذر لغيابي
وبوست جميل فعلا
وأسلوب جديد أيضا لقلمك يدعو للتأمل ويثري المدونة بجماله
ويبشر بوجود موهبة خلاقة

إلى الأمام دائما
وبالتوفيق

تحياتي

سمراء said...

وصف مصر
بس أكيد للصبر حدود
يا تنخ يا تثور
واملي تثور

سمراء

بـراااح said...

صديقتي الجميلة التي افتقدها كثيرا شهرزاد
انتظر دائما رايك في كلماتي ... اشكرك علي تشجيعك و كلماتك الرقيقة
و اتمني تواجدك الدائم
لك ارق تحاتي

بـراااح said...

سمراء
اشكرك علي زيارتي في البراح
نعم يا صديقتي للصبر حدود
و انا ايضا لا اتمني لها ان تستسلم و تنخ و لا اعتقد انها ستفعل
فلم تفعل من قبل
علمناالتاريخ انها تصبر و تتحمل و لكن لا تستسلم
تحياتي لك و اتمني مرورك الدائم

Anonymous said...

القصيده حلوه فعلاً
وكان ليا الشرف إني أشوفها قبل أي حد
وأكتر حته عجبتني أو بمعنى أصح وجعتني

واللي في عرض البحر نط بالآمال
للبر يوصل يا إما يغرق والسلام

أنا متفقه مع حنان إن الخاتمه مش بالقوه اللي الواحد متوقعها
بس تسلم إيدك بجد ودايماً نسمع منك الكلام الحلو واللي بييجي على الجرح دا

رانيا

Anonymous said...

أموره الحصري
:-
شعرك جميل وبيمس القلب بجد
ربنا يوفقك ونسمع أشعار جميله منك دايماً

Anonymous said...

علي شرف
حلو أوي يا حبيبتي اللي انتي كاتباه
معبر أوي
بس أنا ليا سؤال
إنتي ماشيه على نهج مين من الشعرا
بيتهيألي إنك متبعه خطوات الأبنودي مش كدا؟

Anonymous said...

شالت جراحها وعلى الطبيب

فيه بس حرف ناقص في كلمة "جراحها"
يا ريت تعدليها في القصيده

تحياتي

بـراااح said...

يا احلي اب و ام و اخت في الدنيا
بجد مكنتش لاقية كلام ارد بيه عليكم
وجودكم في حياتي هو اللي خلق البراح جوايا
...
بابا حبيبي انا بصراحة مش عارفة انا ماشية علي نهج مين لاني اصلا اتفاجات اني بكتب شعر :))) بس تقريبا منم كتر ما انفعلت مع كلمات الابنودي و جاهين و احمد فؤاد نجم و مؤخرا الانسان الجميل علي سلامة فجاة بدات اكتب
...

فيه بس حرف ناقص في كلمة "جراحها"
يا ريت تعدليها في القصيده

...
حاضر حبيبي

ربنا يخليكو ليا و يا ريت تنوروا البراح دايما

إيناس حليم said...

القصيدة حلوة اوي اوي
بجد انا مبسوطة جدا اني عرفت طريق مدونتك
مريت بمعظم الكتابات وكل اللي شوفته رائع بصراحة.. اسلوبك فكرني بجاهين اللي انا بموت فيه بجد

ربنا يوفقك ولك أرق تحياتي

بـراااح said...

عزيزتي ايناس
اشكرك كثيرا علي كلماتك الرقيقة و زيارتك البراح ... انا كمان بحب جاهين جدا خصوصا الرباعيات ... تقريبا حافظاها كلها من كتر ما باسمعها بصوت سيد مكاوي ... انا سعيدة جدا ان وجدتي كلماتي بها لمحة و لو بسيطة من كلمات الرائع جاهين
مرحبا بك في البراح في اي وقت
تحياتي