BLOGGER TEMPLATES AND TWITTER BACKGROUNDS

Mar 31, 2009

قلبي اتوجع


معرفش ليه قلبي اتوجع
لما لقيتك يا جدع
حلمك و طال حد السما
نفسك تحقق البدع
لكن يا عصفور الامل
وسط الفساد و المحسوبية...صوت غنوتك كيف يتسمع
.....
معرفش ليه قلبي اتوجع
لما لقيتك يا صبية
حلم بفرح ... عيشة هنية
بتخبي دمعة متدارية
تنزل و تفضح شكوتك...من هم سارق فرحتك
....
معرفش ليه قلبي اتوجع
لما لقيتك يا صغير
تحلم ليلاتي تصير كبير
بس الطريق لساه طويل
خوفي عليك من الزحام ... عدم الامان و حاجات كتير

....
معرفش ليه قلبي اتوجع
لما لقيتك يا صباح...طالع و حالم بالبراح
يملا القلوب و الامكنة
بس العيون فاضحة جراح جوة القلوب متمكنة
.....
بصيت في حضنك يا بلد...لقيت الحلم اللي اتولد
شايخ ما قادر عالوقوف...مجروح بظلم و يا خوف
شايل شهادة الميلاد...في ايد و في التانية الوفاة
.....
عرفت ليه قلبي اتوجع

7 comments:

Anonymous said...

ايه الكلام الجامد دا
جيتي على الجرح يا براح

R. Sh

Anonymous said...

حلمك و طال حد السما
نفسك تحقق البدع

بيتهيألي دي أقرب حاجه لشخصيتك يا براح
ويا رب تطولي فوق السما

R. Sh

بـراااح said...

R.SH
نورتي البراح بجد
...
جيتي على الجرح يا براح
...
يا حبيبتي مكانش قصدي اجي عالجرح بس الكلام هو اللي خرج من قلب الجرح
نورتيني بجد و يا ريت اشوفك دايما في البراح

حنان الشافعي said...

كلماتك تحفه بجد
قويه وفي نفس الوقت سهله
حزينه وبرده صاحيه
من اكتر الناس اللي قابلتها بتكتب عامي بالاسلوب ده
من قلبي
ربنا يديم عليكي نعمته

ودي

بـراااح said...

حنان
نورتي البراح و الله انا مبسوطة جدا بمرورك و كلماتك
الحقيقة دي اول مرة اكتب عامي و الحقيقة اني كنت مترددة اني احطها في البراح ... اشكرك على تشجيعك و كلماتك الجميلة

الربان said...

تحياتي

مشاعر جميلة رغم الحزن الذي يكتنفها
مشاعر الاحساس بالغير و التاثر لما
يعتري احوالهم من افراح و اتراح...

من اصعب الاشياء ان يُقتل حلم...و يُغتال امل....
لكن الاحلام و الامال لازم تستمر...لان منهما كان التطور و النمو والازدهار
و السعادة...و كل الاشياء الاخري الجميلة....


تحية للقلب الرقيق الذي استشعر هموم الاخرين....

بـراااح said...

الربان
اشكرك على زيارتك و كلماتك الرقيقة
...
لكن الاحلام و الامال لازم تستمر...لان منهما كان التطور و النمو والازدهار
و السعادة...و كل الاشياء الاخري
الجميلة....
...
نعم معك كل الحق ... نحمد الله ان احلامنا اقوي من معوقاتها و احباطات الحياة ... فلا يمكن ان نتخيل كيف تكون الحياة بدون احلام
تحياتي