BLOGGER TEMPLATES AND TWITTER BACKGROUNDS

May 24, 2009

مطلوب وطن


تعبت يامه من الأنتظار
و أقول دا بكره ييجي النهار
هازرع في قلبي حبة أمل
بكره أكيد هجني الثمار
…..
لكن بكره مش في الزمن
باصبر و بدفع التمن
و يوم ما ضاع مني الأمل
رميت على قلبي حجر
مكتوب عليه " مطلوب وطن"
....
وطن جديد يضمني
يساع لحلمي يحبني
ألاقي فيه حبة فرح
و لقلبي ضحكة تمسني
...
وطن يداوي غربتي
يسمع لصوتي و كلمتي
ينقد ما يرفض فكرتي
خطاويا تلقي سكتي
...
سامحيني يامه و ماتلوميش
وسط الغيلان ازاي اعيش؟
ازاي في حضنك اعيش غريب؟
و ليه ازرع طول سنيني
و آجي أحصد في يوم مالاقيش
حتى الامان يامه مافيش
جاوبيني يامه و ماتداريش
….
سامحيني لو طلع النهار
يسأل عن ابنك البار
قوليله كان ... و هجر الديار
ورا حلم نفسه يحققه
.…
سامحيني لو كنت قسيت
او في ايامي الجاية نسيت
هاقبل باول عرض ييجي
وأقفل ببان الذكريات
هارحل وهانسى كل اللي فات
حزن الطفولة
شيبب الشباب
قلبي اللي مات
...
و في اللي باقيلي من الزمن
هاشيل احلامي علي كتفي
و امشي انادي في كل البلاد
مطلوب وطن
مطلوب وطن

11 comments:

لاسع افندى said...

خلى الامل وطنك
يبقى وطنك احلى الاوطان
بس بلاش تسيب وطنك
احسن تتوه وسط الاوطان
ساعتها تدور على الحنان
مش هتلاقيه الا فى مصرنا
اغلى واحلى واعز الاوطان
مهما عمل فيها الزمان


تقبلوا تحياتى ومرورى

جريدة الصباح العربي said...

يفتح باب بيت المدونين ذراعيه لكل الموهبين في :
1/ القصة القصيرة
2/ الشعر بشتى أنواعه
3/ الرواية "رواية سنوية سنقوم بنشرها في الجريدة"
4/ المقال الصحفي
إذا وجدت في نفسك القدرة على المشاركة أرجوا التواصل معي على الميل التالي
arabicsabah@yahoo.com
شروط المسابقة
1/ ..............................
2/ .............................
3/ ..............................
لا يوجد شروط الشرط الوحيد هو العمل الجيد , والعمل المحترم البعيد عن الإسفاف
المقالات أرجوا أن تكون تخص الانسان العربي , تاريخه , عاداته وتقاليده , مقالات إجتماعية وثقافية ....
أرجوا التفاعل معنا في الجروب على العنوان التالي
http://www.facebook.com/group.php?gid=45202724108#/group.php?gid=78080770039

Sweet Violet said...

رغم الحزن اللى فيها ووجع القلب اللى حصل بسببها .. لدرجة ان عينى دمعت

الا انها بجد جميلة جدااا تسلمى عليها

إيناس حليم said...

على اسم مصر التاريخ يقدر يقول ما شاء..
انا مصر عندي احب واجمل الاشياء
بحبها بعنف.. وبرقة..
وعلى استحياء
واكرها والعن ابوها بعشق زي الداء
***
كلماتك فكرتني بصلاح جاهين اوي :)

صعب اوي ان انسان يفضل طول حياته يدور على وطن يرتاح فيه
لكن مش صعب يلاقي وطن يحبه
حتى لو اكتفينا اننا نحب تاريخه بس
ونتغاضى عن الحاضر
ونتشائم بالمستقبل :)

قصيدة حلوة اوي
تحياتي

بـراااح said...

لاسع افندي
انا معاك طبعا بس للاسف ده مبقاش موجود جوانا كلنا و النهاردة بقت فكرة الهجرة هي المخرج الوحيد و امل شباب كتير قوي
اشكرك على مرورك و مداخلتك
تحياتي

بـراااح said...

جريدة الصباح العربي
اشكرك على مرورك و علي الدعوة
تحياتي

بـراااح said...

سويت فيوليت
اشكرك علي مرورك و كلماتك الرقيقة و اعتذر ان سببت لك كلماتي بعض الالم
اتمني وجودك دائما في البراح
تحياتي

بـراااح said...

ايناس
القصيدة دي انا بحبها جدا جدا ... يمكن هي و الرباعيت من اكتر الحاجات اللي معلقة معايا من كلام جاهين
انا معاكي طبعا في موضوع حب الوطن ... بس ازاي انسان يحب وطنه و يبقي سهل عليه انه يسيبه و يعيش في وطن تاني؟
تفتكر انه كده يبقي بيحبه اصلا؟
بصراحة انا مش عارفة لاني عمري ما بعدت عن مصر اكتر من اسبوع واحد و يوم ما فكرت اسافر كان للدراسة و لفترة محددة
لكن الهجرة تماما ... معرفش احساسها ايه
و بصراحة مش عايزة اعرف
....
بيسعدني دايما وجودك في البراح

mimi said...

وطنا برده أحلي من أي وطن

كلامك جميل جدااااااا

ربنا يديم عليكي نعمة الاحساس

أنا هدخل براااح كافيه ..
بس الميني مم تشارج عندك كام؟؟؟

بـراااح said...

ميمي
البراح منور بوجودك
....
وطنا برده أحلي من أي وطن
....
ما هو عشان كده البعد عنه بيوجع قوي
اتمني ان الحال ينصلح و و كل غايب يعود و الشباب الموجودين ميكونش اقصي حلمهم انهم يسيبوه و يمشوا
بالنسبة للكافية
انتي تنوري و طلباتك كلها عندي - جر رجل زبون يعني - :))

Anonymous said...

عجباني الخاتمه اوي يا براح
الكلام كله بصراحه فيه وجيعه
فعلاً الشباب دلوقت بيحسوا يالإحباط والحل الوحيد اللي كلهم بيحلموا بيه إنهم يترموا في حضن وطن تاني
يلاقوا فيه حريتهم ورزقهم وكرامتهم
تحياتي على إبداعاتك الجميله
رانيا