BLOGGER TEMPLATES AND TWITTER BACKGROUNDS

Jun 3, 2009

موال فلسطيني مصري




يامه مو ويل الهوي
يامه مو ويليا
طعن الخناجر و لا
حكم الخسيس فيا
....
الصبر حلم العواجز
يطرح زهور الأماني
والقهر عدى الحواجز
وأنا إللي واقف مكانى
شايف غيطان البشاير
خايف . وكانن إديا
حتى الحمام إللي طاير
ما رضيش يرفرف عليا
....
يامه مو ويل الهوي يامه مو ويليا طعن الخناجر و لا حكم الخسيس فيا ....
سألت شيخ الطريقه
ما رضيش يجاوب سؤالي
دارى عني الحقيقه
وفاتني حاير ف حالي
سألت شيخ الأطبا
دوا الجرح إللي بيا
نظر لي نظره محبه
وقال دوايا بايديا
....
يامه مويل الهوي
يامه مويليا
طعن الخناجر ولا
حكم الخسيس فيا
....
يامصر وإنتي الحقيقة
وإنتي اغترابي وشقايا
وإنتي الجراح الرهيبه
وإنتي إللي عندك دوايا
علمني حبك عباره سهله وبسيطه وعفيه
شرط المحبه الجسارة
شرع القلوب الوفية
...
يامه مويل الهوي
يامه مويليا
طعن الخناجر ولا
حكم الخسيس فيا
....
أحمد فؤاد نجم

5 comments:

لاسع افندى said...

التقاء احمد فؤاد نجم الشاعر المصرى جدا مع محمد منير الصوت المصرى جدا نتج عنه اغنيه مصريه مليانه معانىوكل كلمه بالف معنى


تحياتى واتمنى يكون اول تعليق

بـراااح said...

لاسع افندي
واضح انك دايما حاجز اول كرسي في التعليقات :)))
فعلا يا لاسع التقاء اتنين بالاحساس ده بينتج عنه اغنية في منتهي الاحساس و القوة
الاغنيه دي غناها منير في مسرحية الملك هو الملك و فعلا كل كلمة فيها بالف معني
اللي بنفس القوة دي برضة التقاء الابنودي مع منير زي اغاني مسلسل جمهورية زفتي
اشكرك علي مرورك و دايما منور الصف الاولاني في التعليقات
تحياتي

الأمير said...

بسم الله

اول زياره

ولن تكون بإن الله الاخيره

ضيق الوقت منعنى أقرأ لكن اوعد بإذن الله برجوعى

سعيد اوى ان شفت المدونه

اتمنى تقبل زيارتى
ولى عوده ان شاء الله

السلام عليكم ..؛

Hanan Elshafey said...

افتقدت وجودي هنا دوما
كلمات رائعه
ودي

شمس النهار said...

اختيار جميل جدا
كلمات مصريه صميمه
نابعه من القلب المصري
شعرا ولحن وصوت